珍惜一樣嘢，大家通常會用「愛護自己眼睛」嚟形容，亦即係話，眼睛係非常重要嘅。弊就弊在衞生署一啲都唔重視，搞到無牌視光師通街都係，市民稍有不慎，隨時中招。
排檔大家見得多，不過眼鏡排檔睇怕好少人聽過。呢，近排深水埗出現唔少賣眼鏡嘅排檔，近視、遠視、散光、老花乜都有。最巴閉嘅係，有檔口連電腦驗眼都做埋，驗完眼畀三舊水，可以配兩副眼鏡，全程半粒鐘搞掂，一條龍服務，問你服未！
本報記者假扮顧客，幫襯其中一檔配老花鏡。檔主由驗眼到視力測試，再到配鏡片鏡框，全套做足只係收兩舊水。平就夠晒平喇，不過，正所謂平嘢冇好嘢，你敢唔敢博吖？
真係博唔過㗎。法例規定，任何人喺本港未經註冊從事視光師專業，或者僱用未註冊人士從事視光師專業，即屬犯罪，一經定罪，可處罰款五千蚊及監禁六個月。記者睇勻檔口內外，根本見唔到註冊視光師證書，跟手Check下視光師管理委員會網頁嘅註冊視光師名冊，亦見唔到檔主個名，明顯有蠱惑喇。
記者攞埋所配嘅老花鏡向註冊視光師求證，弊傢伙，果然中晒招，唔止老花度數唔同，鏡片焦點仲出現偏差，左右眼唔對稱，直頭係貼錢買難受。
香港執業眼科醫生會負責人話，佩戴唔合度數嘅近視或散光眼鏡，除咗會令度數加深，嚴重嘅會導致假近視；如果小朋友佩戴問題眼鏡，更會影響眼部發育，引致弱視。都咪話唔得人驚。
幫襯無牌視光師後果可大可小，弊在衞生署對呢啲亂象視而不見，唔止監管不力，疏於巡查，仲要收到投訴先跟進，而所謂跟進亦只係例行公事，每年得幾宗檢控個案咁大把。
衞生署發雞盲，不良業者咪博大霧囉。呢，有眼鏡舖請無牌視光師被定罪，但交咗罰款之後又再亂嚟。無他嘅，正如有註冊視光師話齋，每次違例罰款只不過幾千蚊，毫無阻嚇性，違例者有恃無恐，仲唔去到盡咩。
話時話，正因為衞生署淪為無牙老虎，所以除咗無牌視光師博大霧，近年俗稱「大眼仔」嘅有色隱形眼鏡亦幾乎氾濫成災咁滯。呢種大眼仔質量參差，佩戴不當，輕則眼睛紅腫、發炎、潰瘍，重則損害視力甚至失明。奇就奇在，咁牙煙嘅產品，居然唔受法例監管，喺商場「格仔舖」或網上隨便都買得到，連視光師指引都唔使。衞生署話就話要將「大眼仔」納入醫療儀器規管，但始終都係得個噏字，實際措施一條都攞唔出，直頭係靠害。
無牌視光師通街都係，衞生署責無可卸，如果署長林秉恩繼續關人個關，惟有以毒攻毒，送佢去深水埗搵無牌視光師驗眼，睇下佢仲敢唔敢發雞盲！