財爺鬍鬚曾發表「史上最廢」嘅預算案，搞到天怒人怨，雖然佢急急跪低人人派六千，但仍然民憤難平，累到佢嘅哎吔大佬煲呔曾懷疑畀人鬆㬹搞到隱隱作痛。孖曾大難當前，但問責團隊中就有人睬佢哋都傻，邊個？咪係「條條fing」嘅政務司司長唐英年囉，佢今日起放八日大假，十三日先至返工，而佢份工就由教育局局長孫明揚兼任。
唐唐身兼西九管理局董事局主席，尋日走出嚟公布管理局選定Norman Foster嘅設計後，有好多環保同藝術團體都對呢個決定好有意見，而被選中嘅公司亦都極具爭議性，係咪要諗吓花時間去聽吓意見或向公眾釋除疑慮？中央政策組首席顧問劉兆佳日前喺北京爆響口話香港嘅官民關係已到臨界點，明日仲有大批市民上街遊行，唐唐竟撒手不管匆匆休假去矣！咁仲算做好佢份工？
唐唐忽然掉低所有工作放大假，足以引證政制及內地事務局局長「林公公」林瑞麟早前嘅說話，就高官聽預算案期間瞓覺真正體現團隊精神，團隊精神原來係咁解嘅！