政情：周總補選任馬會大董
港鐵行政總裁周松崗（周總）將於今年底退休，但相信佢嘅退休生活一定唔會悶，因為馬會尋日正式公布佢加入賽馬會董事局做大董，接替做咗馬會大董三年、年屆七十歲退休嘅布魯士。記得周總講過最遺憾就係多年來一直專注工作，忽略欣賞人生路上其他美好嘅事，現時佢加入到既可以幫到人又可以娛樂大眾嘅馬會，相信可以如願以償。
進入六十耳順之年嘅周總，○四年已成為馬會會員，○八年成為遴選會員，今年再補選做大董，認真可喜可賀。馬會主席施文信對周總嘅加入大表歡迎，大讚周總喺國際商業巿場上有極為廣闊經驗，係馬會未來發展嘅重要資產。其實周總在工業發展方面有傑出貢獻，而且喺美國、英國及日本都有擔任過要職，所以佢加入馬會絕對係一個好消息。