政情：陳碧鏵盆菜宴撐母校
已經有一百五十年歷史嘅嘉諾撒聖心書院為咗籌款改善校園設施，尋晚特登搞咗個籌款盆菜宴，全場衣香鬢影，非常熱鬧。活動搞手、電視廣播有限公司國際業務總經理陳碧鏵話，晚宴只係一連串籌款活動之一，單係尋晚就已經籌得接近二十萬元，而且仲可以畀到機會老、中、青三代校友共聚一堂，成績都算滿意。
晚宴筵開五十四席，連早到1963年畢業嘅校友都有嚟捧場，可見大家對母校嘅感情有幾咁深。
陳碧鏵話，自己有今時今日嘅成就，全部都係拜母校悉心培養所致，現時母校有需要籌款，做舊生自然要義不容辭企出嚟幫手啦！佢透露，學校成個改善工程需要二千萬元，由於之前已經搞咗幾次籌款，加上一個唔想出名嘅善長大手捐出一千萬元，距離目標只差五百萬元左右，好有信心達標喎。
尋晚活動以紅色為主題，陳碧鏵身先士卒以一身紅色嘅打扮，睇落相當醒神，除咗佢之外，另一著名校友、前房屋署副署長鍾麗幗尋日都有出席活動，原來佢剛剛喺杭州返到香港，一落機就即刻嚟支持母校嘅活動，認真畀面。