政情：開會磨爛蓆 議員難甩身
二○一二年特首及立法會兩個選舉辦法條例草案陷入膠着狀態，立法會過去三日合共進行三十個鐘頭辯論，但仍未就立法會選舉辦法嘅草案進行三讀。連日開會，各黨派每日重複立場，論述大致相似，負責嘅政制及內地事務局局長林瑞麟同議員鬥耐性，搞到議員精神疲憊不堪，但最大鑊嘅係個個被困立法會，其他嘢乜都做唔到，依家唔知點收科。
今日係立法會第四日辯論選舉條例草案，由尋日開始，審議進度以龜速進行，冇人估到要開到幾時先完晒全部議程，搞到唔少議員行程大亂。民主黨尋晚本來舉行一年一度嘅春茗，不過八個議員同部分政黨嘉賓都要罰留堂喺立法會等投票，春茗變得冷冷清清，好彩仲有副主席單仲偕充撐場面。
公民黨陳淑莊都唔好得幾多，佢諗住今晚陪媽媽睇王菲演唱會，因為兩母女好少齊齊睇show，今次撞啱大家嘅共同偶像，專登撲飛抽空陪媽咪，點知撞着長命會，目前只求今晚可以完成佢負責嘅議程，否則就要放媽咪飛機。
一班建制派議員都畀馬拉松會搞到好頭痕，身兼全國人大代表嘅工聯會黃國健原先訂好機票尋晚八點飛北京參加今日人大開幕禮，但眼見連立法會條例草案未三讀，惟有焗住改機票到明日起程。全國政協、經濟動力林健鋒都遇到同樣問題，望住張一改再改嘅機票，兩個人都極度無奈。
投票系統忽然故障
立法會秘書處現時評估，希望可以今日三讀立法會選舉條例，但之後仲有停車熄匙條例草案、帳委會就直資學校帳目混亂嘅報告辯論等火辣議題，分分鐘到今日都未完會。泛民多個黨派明日下晝聯手發起反預算案遊行，到時分身都唔掂。民主黨張文光話今日睇情況再決定是否要求立會主席押後到星期一先復會，以便遊行可以順利進行，仲可以睇埋明晚曼聯對利物浦嘅英超大戰。
審議草案期間有段小插曲，立法會主席提出將點票時間由三分鐘改成一分鐘，希望加快進度，但要經分組點票先可以通過。不過投票期間，會議廳嘅投票系統忽然故障，最後仲唔夠票通過，因快得慢。