中環出更：陳祖澤退休樂做巴士阿叔
前馬會主席陳祖澤（John）自榮休後一直深居簡出，曝光率減少，但佢嘅退休生活依然充實，每月定期出席中環多個飯局，包括新舊政務官交流城中熱門話題嘅「鳳凰午宴」及行政會議成員每月一度嘅星期四聚餐。不過，阿John再冇好似以前咁有座駕載出載入，取而代之係改搭公共巴士，卓妮早前就目擊阿John同普羅市民逼巴士嘅過程。
生活平民化
早前有個星期二下午，卓妮喺中環德輔道中近砵典乍街見到西裝骨骨嘅阿John挽住公事包，行到九巴104號巴士站等車，大約十分鐘後，巴士駛至，佢同其他乘客魚貫上車，步上巴士時即向車長出示證件，然後步進車廂。卓妮見阿John非常禮讓，主動企埋一邊讓其他乘客登上巴士上層，然後自己就企喺車門旁邊，握緊扶手。
卓妮上前同阿John攀談，佢主動話︰「我成日都搭巴士㗎啦！」問佢近況如何，佢笑笑口話︰「都係咁啦，有馬跑咪跑吓馬囉！」雖然阿John講到好悠閒咁，但佢退休後生活依然充實，現時仍會以顧問形式向多間企業提供意見，仲喺灣仔設有辦公室與外面聯絡，嗰日佢就係食完飯搭巴士返灣仔辦公室。
阿John係前九巴董事長，依家轉任九巴非執行董事，亦係路訊通集團（RoadShow）董事會主席，所以至今仍擁有九巴免費乘車優惠，隨着近年工作減少，每當一個人外出時，巴士便成為佢主要代步嘅交通工具。不過，如果與太太同行嘅話，點都會開私家車等太座舒服吓嘅！
卓妮