劉兆佳又唔認數 誠信陷「臨界點」
【本報訊】政府首席智囊中央政策組首席顧問劉兆佳，前日在傳媒面前指社會爆發群眾性不滿，反映香港或已到達臨界點，其後又反口否認講過該番話。他昨日繼續死撐無用過「臨界點」字眼，但承認香港社會有民怨，容易出現紛爭。學者指「臨界點」字眼敏感，觸動政府神經，劉或受壓收回言論。多名市民致電電台炮轟劉兆佳「自打嘴巴」，甚至質疑他是「無間道」，專幫政府「倒米」。
劉兆佳前日回應預算案風波時爆響口，指「（香港）好容易喺某啲事就挑咗出嚟，形成群眾性嘅不滿，事實上嚟講，可能香港已到咗一個臨界點，究竟香港往後應該點樣走，政府喺呢方面擔當咩角色，社會應作廣泛討論。」他在當日下午已否認講過該番說話。
昨日有多份報章均以大篇幅甚至頭版報道其言論，他昨日再於北京聲稱：「基本上我無用過『臨界點』呢個字，我只係話依家去到嗰個地步，因為有部分人對原來嘅施政方針有唔同嘅意見，應該係去到一個時候，大家就未來香港嘅發展，同政府施政可以展開一場辯論。」他又否認制訂預算案時沒有諮詢民意，死撐預算案有很多好的內容，不過容易因某些事引起民眾反彈，但政府已急速調整，相信政府派錢可滿足部分市民訴求。