政情：季詩傑返社記撐阿陶
社民連年初經歷大撕裂，創黨主席黃毓民同現任主席陶君行各據一方，兩方陣營均有人因不滿對方處事手法而「離場」，先辭去秘書長一職、再高調退埋黨嘅季詩傑就係人辦。隨着毓民拉隊走人兼另起爐灶成立「人民力量」，阿季扭扭擰擰一輪後，尋日亦終於決定重返社記。
無意搶回秘書長職
自社記醞釀黨爭後，阿季毓民不時隔空互寸，後者更喺網台大爆前者帶阿陶去「新花都」跳舞，事件弄得滿城風雨，更迫使阿季退黨。直至上月初，即使毓民同另一議員陳偉業拉隊走人，身為阿陶兄弟嘅阿季仍遲遲未肯返去，如今佢打定主意，相信最開心係阿陶。
阿季尋日同我哋講，當初佢退黨，都係因為毓民喺度，如今對方走咗，而佢又想為社記度多啲好橋，故決定「重返娘家」。阿季又話，由於現時社記已有人填補秘書長一職，佢亦無意「搶位」，故即使返黨亦只係做番個普通會員。至於同樣喺黨爭中退黨嘅前財政彭義恍，據講就好享受「自由身」，暫無「歸位」之意。