中環出更：蔡志明喜事重重運氣佳
「玩具大王」旭日國際老闆蔡志明最近人逢喜事精神爽，先買咗個大玩具「喜運佳」錶行畀自己，然後大女加敏再添咗一對外孫仔，跟住囝囝加讚（Karson）又同模特兒汪圓圓拍拖，好事一單接一單。
前晚「喜運佳」舉行春茗晚宴，除咗忙於湊BB嘅加敏外，蔡家總動員撐足成晚，仲提供總值二百幾萬元獎品與眾同樂，現場賓客都沾染到蔡家嘅豪氣同喜氣。
笑言囝囝女友OK
蔡老闆當晚心情勁靚，卓妮向佢連聲恭喜，佢問都唔使問原因就照單全收。講起阿仔同汪圓圓嘅戀情，佢笑笑口話，日前同圓圓見過面。感覺如何？佢笑言：「ＯＫ啦！」咁啱蜜運中嘅加讚嚟到，問佢點解唔帶埋女友嚟，佢話自己要招呼賓客，如果帶埋圓圓嚟咪要成晚照顧佢囉！咁細心嘅鑽石男友，真係絕無僅有！
當晚着咗件紫紅色絲絨靚衫嘅蔡太李惠莉一樣心情靚靚，問佢恨唔恨飲新抱茶，佢好開明話，唔會畀壓力後生仔，又話加讚仲後生，拍拖好正常啫！講到乖女加敏，蔡太話過年期間經常去探加敏及新添嘅一對外孫，又話加敏嘅大女就嚟三歲，依家已經喺佢創辦嘅安基司國際幼稚園返學喇！
旺區搵舖擴充錶行
講起新玩具「喜運佳」，出晒名愛錶嘅蔡志明笑稱，咁多年嚟使咗成億元幫襯佢哋，知道佢哋要賣，但唔想畀人收購後改埋名，所以一於買咗佢。依家蔡志明同加怡、加讚三人都入咗董事局，將來會喺香港旺區搵多啲靚舖，就算租金貴都唔緊要，事關預留咗好多錢作發展之用。
蔡家好運停不了，連抽獎都抽到手軟。蔡志明率先抽到價值一萬八千元嘅女裝錶，佢好大方咁即時轉送畀任職會計部嘅女員工。幸運之神都好眷顧加讚同加怡，加讚就將獎品捐出再抽過，靚絕嘅甜蜜蜜心情，真係不言而喻。
卓妮