醫生會話過你知，預防勝於治療；消防會循循善誘，防火好過救火；之不過咁，醫管局高層雖然一個二個醫生出身，原來係唔識得預防勝於治療嘅道理㗎，要等到火勢熊熊一發不可收拾先至後知後覺四出撲火！
唉，功夫茶都唔知寫過幾多次，香港醫療系統接近崩潰邊緣，事關人手非常短缺，醫護人員逃亡潮一次又一次出現。亦即係話，警鐘響完又響。正常嚟講，身為醫療一哥嘅食物及衞生局局長周一嶽，點都要亡羊補牢㗎啦，誰不知呢個混帳局長居然無動於衷，遲遲都冇諗辦法改善喎。
好嘞，局長大人唔知係失聰定係失明，長期冇正視問題吖嘛，公立醫院醫生終於忍無可忍。根據公共醫療醫生協會會長蘇潔瑩嘅講法，會方已經向醫管局提出六大訴求，包括加快晉升速度、增設額外當值津貼、公開人手安排等等，若果局方未能提出改善藍圖，將會採取工業行動，話唔定發起靜坐。
嘩！呢鋪杰撻撻咯！萬一醫生真係採取工業行動，容乜易損害病人利益㗎！
眼見醫生滿腔怒火，幾乎要學似中東咁整你一劑「飢餓革命」，醫管局高層終於知驚嘞，幾大巨頭空群而出周圍撲火，分別同前線人員會面。主席胡定旭以及行政總裁梁栢賢連跑幾場，同醫生組織開會商討紓緩人手流失嘅對策，務求最後關頭挽回人心。至於周一嶽咯喎，一於臨急抱佛腳走去逃亡潮重災區屯門醫院巡視，了解苦況咁話。
嗱嗱嗱，呢啲唔係後知後覺又係乜？打個譬喻吖，有一座三十層樓高嘅大廈着火，本來起火地點係一樓，如果你第一時間救火，咁咪損失輕微囉，可惜周局長等等豬油膏官老爺闊佬懶理，硬係要拖到大廈火勢蔓延到三十樓就快燒通頂先至出動，神仙都難救啦！
前線醫生聯盟前主席羅智峯係咁講嘅：「由受訓至取得專科資格，再做多十年都未升，前後累積做咗十七、八年，係人都走啦！」
大家知唔知周一嶽呢個局長混帳成點？佢話喎，人手唔夠咩，中層以及高層醫生亦要落場幫手。呢一番荒誕絕倫嘅言論引起另一浪反對聲音，一班公立醫院內科高級醫生發表投訴信，批評周局長企圖淡化內科逃亡潮。
計功夫茶話齋，雖然遲到好過冇到，儘管亡羊可以補牢，之但係家陣講緊嘅係撲火，未必咁樂觀喎。就好似北非嘅利比亞咁吖，面對倒台危機嘅狂人卡達菲臨急臨忙開倉派錢都冇用，搞到兵行險着開倉派槍，前途仍然非常黯淡。不如咁講啦，局長撲火還撲火，小心引火自焚呀！