立法會海濱規劃事宜小組委員會嘅北美豪華考察團，幾經波折終於可以成行。距離各大小選舉得番一年時間左右，明白人生得意須盡歡真諦嘅議員，都知道唔可以再蹉跎。
呢個團途經多倫多、波士頓、紐約、達拉斯同溫哥華，名副其實東岸玩到西岸，確實未出發先興奮。
豪爆團預計四月廿四日出發，一直玩到五月二日先返到香港，早機去晚機返，酒店連食宿加雜費，坐經濟艙就每位四萬九千元，坐商務艙就齊頭八萬元，可想而知有幾豪。
所謂有權利就有義務，呢次立法會秘書處先小人後君子，講明要議員填清楚佢哋嘅要求，好似坐經濟定商務、近窗定近走廊、要唔要用飛行哩數、食唔食素、同埋會否提早出發或者延遲返港等，事關訂好晒之後又話改要罰錢囉！仲有，秘書處亦提醒想去嘅議員應該去足全程，唔好半途鬆人。
立法會議員四年任期裏面，如果用到最盡，每人有五萬五千蚊嘅外訪開支，如果唔夠要自己補貼，有剩就拎出嚟攤分。