政情：翟紹唐履新「拜地主」
資深大律師翟紹唐堪稱新紮「公職王」，本身係監警會主席，近期再相繼獲政府委任為馬尼拉人質事件嘅死因研訊主任同最低工資委員會（低資會）主席，接公職同接官司一樣咁密。講開低資會主席一職，翟紹唐今日正式履新，尋日特登去蒲勞工界新春酒會，為份新工「拜地主」。
同勞工界打好關係
勞工界新春酒會，係勞工界每年最人強馬壯嘅活動之一，翟紹唐接得低資會主席呢個燙手山芋，點可以唔把握機會嚟同勞工界搞好啲關係？現場所見，翟紹唐滿場飛，同勞工界人士有講有笑，表現輕鬆。記者問佢，今日返新工做低資會主席，心情如何，佢笑住話，最難係應對傳媒喎。勞工界為爭最低工資嘈到拆天，兇神惡煞，咁難纏嘅對手，翟紹唐尋晚都應付得游刃有餘，打成一片，使乜驚記者吖！
翟紹唐本身係資深大狀，同勞工界大纜都扯唔埋，為咗低資會份新工，特登嚟明刀明槍拉關係，睇嚟佢對參與公職有心有力，唔怪得外界傳佢有可能入官場啦。