政情：廠商會食品展抗通脹

廠商會尋日搞慶功宴，祝賀早前舉辦嘅工展會丁財兩旺，入場人次同銷售額都係歷屆之冠。但消費者口味變得好快，廠商會副會長兼展覽服務有限公司主席施榮懷話，嚟緊唔會只着眼於人流數目，優化工展會先係主打，包括考慮引入銷售紅酒、年輕人潮物等，開拓新市場。

市價八折售國際美食

踏入新年，廠商會頭炮係搞旺食品嘉年華，呢次移師旺角花墟公園舉行，由四月二十一日至五月二日，一共有二百七十個攤檔，比上屆多五十幾檔，反應熱烈。施榮懷話，廠商會今次以優惠價租金優待檔主，雙方傾好條件，食品價錢要優惠，回饋市民，所有美食會以市價約八折出售，幫大家抗通脹。聽聞屆時有台灣、韓國及日本美食都未定，等大家大飽口福。