政情：棠哥頸椎病術後握手有力
工聯會會長鄭耀棠做完頸椎移位手術唔夠兩個拜禮，未完全康復仲要休養，但心情就已經明顯好番晒。立法會議員黃定光（象哥）近日探望過棠哥，話見到佢跳跳紮，個人不知幾輕鬆，象哥都戥佢好開心。象哥話，佢同棠哥喺內地個屋苑做鄰居，兩人經常有開枱切磋麻雀，但棠哥患病之後，打麻雀連甩牌都冇力，做完手術就即刻唔同晒，同佢握手仲好有力添。睇嚟佢哋係時候擇日再賽，打多幾圈。
尋日勞工界舉行新春酒會，勞工界領袖雲集，棠哥仲休養緊未能出席，工聯會立法會議員葉偉明話，棠哥已漸漸恢復返工聯會開會，葉偉明尋日見過棠哥，話佢做手術後精神過以前好多，不過就仲未決定幾時可以全面復出。
劉千石用針刀治療好番
酒會上仲有前立法會議員劉千石，佢話同棠哥好熟，兩人仲分享過如何對抗頸椎病，石哥兩年前頸椎都出現過問題，個人無故跌倒，睇中醫用針刀醫治後已經好番，當棠哥四出打聽有乜方法醫頸椎病時，佢都建議畀棠哥試試。