政情：Rita劉冷對阿Paul避眼神
旅遊界一個阿珍、一個阿蓉，搞到滿城風雨，喺擾擾攘攘當中，又發生咗商務及經濟發展局局長劉吳惠蘭（Rita）涉嫌以「小心政治前途」「恐嚇」旅遊界立法會議員謝偉俊事件。兩個人尋日喺立法會會議上仇人見面，無人再提「恐嚇」事件，但阿Paul同局長心裏面都仲有條刺，就明顯不過。其中阿Paul講嘢話裏有骨，劉吳惠蘭就垂低頭唔望阿Paul，兩人採取嘅策略，同小學生鬥氣冇乜分別。
有人批評旅遊業議會自己人管自己人玩晒，無力嚴打，政府於是拋出四個方案，一係升格議會、一係改革議會，非業界理事佔多數；一係成立獨立機構監管，一係由政府接手。民主黨、民建聯同自由黨事先張揚支持「獨立」，尋日喺立法會同一口徑話搞「獨立」梗要時間，支持喺過渡期間要議會先換理事兼「釋放」懲處權力，仲窮追猛打直指今屆政府得番年半，叫政府唔好諗住拖拖吓過骨，快手定案。
講到檢討方案，一早話咗政府無意接呢個燙手山芋，劉吳惠蘭尋日用地產代理監管局打比喻，話旅議會依家養六十幾人，每年要二千幾萬；地監局多廿、卅人就用三千五百幾萬，要諗吓資源、培訓同招募。
對於劉吳惠蘭嘅所謂比喻，立即發炮批評嘅，除咗阿Paul之外仲有阿Paul師傅詹培忠，二人異口同聲，問點可以因為資源問題就唔去做，搞到局長急補鑊，提高語調話無講過負擔唔起或係咪值得，只係有人攞地監局出嚟講，咪提啲資料比較吓，講起嚟都幾勞氣。
阿Paul仲有意無意話，任何「小心」唔好得罪當權派嘅「提醒」佢都唔會理。阿Paul講嘢時局長全情低頭睇文件，莫講話點頭，連眼神交流都無，但佢對梁劉柔芬同劉健儀又好唔同，佢望住兩位女議員展現笑容，簡直判若兩人。
胡兆英讚自己被狂窒
到處辣着火頭嘅阿Paul尋朝又同旅遊業議會主席胡兆英一齊上電台節目，呢對冤家又再唇槍舌劍不停鬥嘴。胡兆英話有同班旅行社老闆溝通過，但阿Paul未等佢講完就當面踢爆︰「我好斬釘截鐵，佢冇同我哋有過任何接觸，包括書面或者電話。」
胡兆英講明唔支持成立獨立機構或交畀政府管理，尋日響節目度猛讚議會喺埃及政變事件上作出嘅反應同取消出團決定夠果斷，阿Paul又抵唔住頸一句窒過去，「講到自己咁英明神武，好多決定係要配合保安局同國家架。」