中環出更：蔡關穎琴幫理不幫枕邊人

中華總商會會長蔡冠深早前提出，希望中央考慮畀港人申請護照，呢個創意無限嘅諗法觸動唔少捍衞一國兩制人士嘅神經。幾日後卓妮喺酒會度見到蔡太蔡關穎琴，問佢老公有冇受到好大壓力，佢思索一陣話：「冇聽佢呻喎！」咁蔡生拋出呢個議題前有冇問過佢呢位律師太太嘅意見？蔡太係直性子，聽完直話直說：「冇，如果佢問我，我實話會引起好大爭議，不如唔好提啦！」又係嘅，律師講法制同邏輯，提出咁有創見嘅人，少啲冒險精神都唔得。