中環出更：馬景煊嫌奶粉錢毛利少
近排嘅奶粉荒令到全城師奶陷於恐慌，百年老店先施百貨第三代傳人兼董事總經理馬景煊（Philip），生意腦筋轉得好快，打算喺先施大賣奶粉。不過Philip笑言，認真研究過後都係打退堂鼓。點解？利錢好低囉。
日前卓妮喺酒會度見到春風滿面嘅Philip，睇佢咁好笑容，先施喺年關傳統旺季梗收錢收到手軟啦。Philip聽罷笑到見牙唔見眼話，一月嘅生意真係好好，不過二月大家忙住過年，生意自然淡靜咗啲，遲啲會搞清貨大減價催谷吓生意。
旺丁唔旺財
講開做生意，Philip自爆早排見奶粉咁好賣，連內地人都落嚟香港搶購，就好認真咁研究喺先施賣奶粉得唔得；結果發現其實奶粉錢唔易賺，毛利好少。如果擺喺先施賣，吸引人流入場就得，但實質落袋嘅利錢就好少喎。
轉頭卓妮見Philip太太Vera着得靚靚嚟到，佢手挽紅色Clutch靚袋，袋扣位置鑲咗塊好搶眼嘅玉石，果然品味超卓，Vera話個袋係喺外國買嘅。睇嚟Philip唔搵太太做先施買手，真係走寶囉！