中環出更：吳永嘉爆唐人街藏筍價茅台
茅台千金難求，價錢媲美黃金。城中一班茅台發燒友近日發現一條掃貨門路，就係遠赴外國唐人街掃平貨。以一支近十年嘅一斤裝茅台為例，喺內地以八千人民幣都買唔到，但喺外國唐人街，隨時花八百港元搞掂，筍到極。
香港茅台之友協會秘書長吳永嘉（Jimmy），推動茅台美酒不遺餘力。卓妮尋日喺飯局撞到佢，幾杯落肚嘅Jimmy爆咗個小秘密，佢話買上等茅台，除咗去貴州，識得去歐美唐人街中國辦館捐窿捐罅，一樣執到寶。
辦館尋陳年極品
何解？原來唔少辦館老闆早年愛儲存茅台，可惜外國人唔多好飲，識貨者少，佢身邊有朋友無意中發現門路，兩年前派人去美國三藩市及洛杉磯等唐人辦館掃貨，更發現當中有珍藏二、三十年嘅極品茅台。辦館老闆見有知音人，悉數出售，價錢仲唔貴添。
消息好快傳咗出去，唔少茅台友聞風而至，但凡多華人聚居嘅唐人街，貨源已近水尾嘞。Jimmy畀貼士大家，想入貨的話，可以考慮去較少華人聚居嘅省市，話唔定執到寶喎！