中環出更：葉劉逛潮店 幫囡囡購至愛

葉劉自從轉新look、踢走掃巴頭形象後，着衫好落本，每次出席公開場合，幾乎件件係名牌。各大名店如Armani、Max Mara及Paul Smith等，不時見到葉劉身影。今次轉行Tory Burch，唔通想換吓口味？

葉劉喺Tory Burch逗留近十五分鐘，一時睇吓手袋、銀包，一時又望吓衫，店員主動上前介紹新貨，葉劉顯得好受落。揀完一輪終於有心水，碌卡找數。臨行出舖頭前，葉劉攞部手機出嚟發短訊，莫非向囡囡榮欣報告行蹤？

到底買咗乜，卓妮一於上前八卦吓。原來係幫囡囡買皮帶：「我幫個女配番條belt之嘛，（Tory Burch）款式咁年輕，點啱我吖！」榮欣愛Tory Burch有原因嘅，葉劉話，Tory Burch創辦人正係美國著名賓夕凡尼亞大學出身嘅一位名媛，同囡囡係校友，加上品牌富民族特色，啱晒着衫具個人風格嘅榮欣。

Tory Burch近年喺美國冒起，深受女士歡迎。	Tory Burch銀包設計精緻，葉劉揀到入晒神。	成功幫囡囡買到皮帶，葉劉即刻攞個手機出嚟傳短訊。

美總統夫人追捧品牌

其實Tory Burch近年喺美國人氣爆燈，品牌冒起無耐，已深得女士追捧，連美國總統夫人米雪奧巴馬都係粉絲。其設計以簡潔平實見稱，多着幾季都唔怕過時。

卓妮