政情：政協體驗內地高物價
通脹猛如虎，內地房價、物價、工資乜都飛升，一眾港區省級政協都有深刻體驗。日前港區省級政協聯誼會專業委員會舉行春茗酒會，創會會長兼北京市政協常委林海涵話，佢年年都會買一大箱北京黃瓜返港作手信，但係今年至少貴咗一成半至兩成，可見京城民生物價升幅有幾勁。
林海涵係執業會計師，對數字梗係特別敏感。佢話京城嘅房價升得太勁，支持中央繼續出招調控樓市，千祈咪手軟。佢好關注民生必需品價格問題，問佢有冇切身嘅體驗，佢話平時食飯多數由當地安排，好難察覺食嘢有咩變化，但係佢好鍾意食北京黃瓜，次次都買成箱返嚟自用或送畀朋友，咁就見到通脹有幾犀利喇！
丁午壽反對最低工資
開達實業董事長丁午壽係江蘇省政協，佢間玩具廠喺內地養住超過一萬名工人，但廣東省實施最低工資，今年三月又要加薪近一成九，佢知有啲廠商仲出現管理人員工資低過工人嘅奇景，所以就算香港引入最低工資已成定局，佢至今都堅持反對。