政情：金刀梁叫PY磅水撐器官移植
近日公立醫院爆發醫生離職潮，醫生工會仲醞釀發起工業行動，舊年十一月先上任嘅醫院管理局行政總裁梁栢賢（PY）睇怕都有排煩。尋日佢抽空出席一個器官捐贈推廣活動，同一班器官受贈者分享吓重生喜悅，冷不防席間又畀人叫「磅水」。邊個咁大膽？就係外號「金刀梁」嘅行政會議成員梁智鴻。
賣口乖嗌「老總」
一直好支持器官捐贈嘅金刀梁係嘉賓之一，佢致辭時提到自己當年做醫管局主席時，醫管局每年所獲撥款大約三百億元，但今時今日已加碼到三百九十幾億啦，講到呢度佢話鋒一轉，話雖然未知醫管局今年會放幾多錢落器官移植服務，但相信喺PY治下一定有多無少，仲賣口乖稱呼PY做「老總」，要代一班等候器官移植嘅病人預先多謝梁老總咁話。PY喺台下笑而不語，好似一時間唔係好知點反應。
其實器官捐贈不僅可令垂危病人重獲新生，仲可以拯救埋佢哋嘅家庭，好值得支持，金刀梁叫PY撥多啲錢，相信佢都好難反對嘅。