中環出更：李運強怒轟預算案離譜
財爺掟出「史上最廢」預算案，畀全港市民鬧爆。「造紙大王」李運強都睇唔過眼，批評份預算案冇還富於民，離譜之極。
「做官要順應民意」
李運強尋日現身馬場為愛駒「包裝大師」打氣，講起份預算案，佢都無名火起，批評注資六千元入落打工仔強積金戶口，升斗市民根本攞唔到：「啲錢又唔係佢（財爺）嘅，市民已經熱血沸騰，應該還富於民至啱。」李生又點醒鬍鬚曾：「做官要順應潮流，聽吓民意。」政府施政一向傾斜大商家意見，今次連富豪都替小市民發聲，份預算案幾得民心，心照嘞！
講番跑馬賽果，中建集團老闆許世勳嘅「讚惑」喺第十場勝出，袋近八十萬元獎金，許世勳夫人笑逐顏開同老公齊拉頭馬，但就唔見公子許晉亨同新抱李嘉欣，許家又添喜事，睇嚟剛出世嘅男孫Jayden Max，腳頭真好。
賭王愛駒「爆冷」就出戰第七場，可惜跑第四，仍捧走四十八萬元獎金。四太梁安琪冇嚟打氣，派公子猷亨上陣。見「爆冷」飲恨三甲，猷亨無奈地緊咬下唇，肉緊程度不下於爸爸。
