中環出更：陳健波去P唔扮嘢做自己
香港癌症基金會周年慈善餐舞會，向來係社交圈盛事。今年搞搞新意，Party以十八世紀印度宮殿為背景，城中名人穿金戴銀，變身印度西施同印度王子開P。但印度Look原來好考人，立法會議員陳健波翻轉衣櫃都摷唔到一件印度衫，一度好頭痕。
阮偉文變印度王子
Party上周六喺太古坊舉行，大會Dress Code係印度Look，名媛榮文蔚老公阮偉文去慣Ball，順手拈來一頂插滿羽毛、鑲滿寶石嘅王子帽，扮相維肖維妙，不過頂帽有成五、六磅重，戴咗一陣，膊頭都「冤」埋。
平時西裝骨骨嘅陳健波都拖埋太太嚟湊熱鬧，原來佢應滙豐保險總監及工商保險主管蔡香君邀請嚟撐場。波波着西裝，打領呔，拍埋嘉賓身邊，似乎單調咗啲。無法嘞，佢同太太都冇印度衫，一於以不變應萬變，着飲衫最穩陣。