中環出更：名人拍住拖 齊捧藝術節
正當西九文化區搞到一鑊泡，香港藝術節卻愈來愈受歡迎，今屆更創下有史以來最佳嘅票房紀錄，售出超過十二萬張門票，入座率平均達到百分之八十七，有百多場表演嘅入座率，仲高達百分之百添。
封蝕本門 李業廣開懷
雖然歐元升咗唔少，請外地藝術家來港成本高咗好多，但係藝術節主席李業廣冇有怕，喺上星期舉行嘅藝術節開幕禮上，佢笑晒口咁暗示已經封咗蝕本門，話今屆藝術節搞得好成功咁話。
銷情咁好，不乏一班政商界名人捧場客，好似行政會議成員張建東夫婦、港區人大代表馬豪輝夫婦及前金管局總裁任志剛夫婦，都係藝術節嘅擁躉，尤其係佢哋因工作冷落嬌妻，藝術節節目正好大派用場。
任志剛夫婦係藝術節擁躉，上星期手拖手出席開幕禮，卓妮問任總買咗幾多場節目門票，點知佢笑而不答，反而任太就笑笑口好大方透露總共買咗八場門票，當中包括歌劇及話劇，但佢話最重要係睇得開心喎！
卓妮仲遇到行政會議成員張建東（Marvin）同太太，Marvin話即將要去英國倫敦公幹一段時間，要留低太太喺香港，但醒目嘅張太已買咗多場節目門票解悶，佢話無論經典或現代話劇、歌劇都咁鍾意睇。
同樣忙得好交關嘅馬豪輝，好快就要出發到北京參加人大、政協會議，只能陪太太睇開幕及閉幕嘅節目，而佢太太就話會睇吓有冇節目啱睇，一定唔會悶親。馬太本身對唱粵曲好有興趣，藝術造詣好深，之前曾經公開表演，佢已經準備好喺下個月有一場籌款演出，到時「兩會」已經閉幕，老公一定會捧場。
卓妮