鬍鬚曾份財政預算案慳水慳力，年年如是，唔會有乜新意，難怪佢喺預算案公布前夕還可以夢囈「大社會」，而出來的預算案就令人大不滿。照道理，庫房水浸，有錢好辦事，有乜好得過大派錢還富於民。然而，鬍鬚曾就係十足十花崗岩頭腦，民意話派現金以濟通脹燃眉，澳門年年派，新加坡見紅都派錢，鬍鬚曾就一於堅持唔派就唔派，但係佢又變唔出乜新意，一次性寬免小恩小惠，好似倒模咁，財爺呢份工認真好做。
鬍鬚曾最叻廢噏，唔肯深入群眾，一味話已「照顧埋五無人士」，又吹水狗屁不通的「政府有錢即係市民有錢，市民有錢即係政府有錢」，一副「何不食肉糜」嘅廢帝口脗，全不知民間疾苦，正是「台下少柴無米，台上富貴風流」，飽漢確不知餓漢飢，要不然，有錢派又怎會派得如此不「給力」？
看守政府明明係守財奴，盈餘七百多億，儲備近六千億，如今派極都係四百四十億上下，而且假借抗通脹之名，唔肯退稅，傷盡中產階層嘅心，佢哋年年交稅，福利最少，買唔起樓嘅更要捱貴租，如今庫房水浸，政府連六千元上限退稅都唔畀，唔怨恨憤怒就有鬼咯！
至於為強積金戶口注入六千元涉及二百四十億，又係遠水不能救近火。鬍鬚曾一味站在「官富」而睇唔到「民窮」嘅角度理財，如此不實事求是，當學者、議員、市民嘅聲音冇到，總而言之，這個一意孤行，堅持市民啲錢係佢啲錢嘅守財奴——不是東西！
儲備過多，年年盈餘，不退稅，不派錢，又冇全民退休保障制度，呢份預算案點收貨？