政情：細佬執垃圾田少讚難得
新民黨副主席田二少田北辰前排喺電視真人表演執垃圾同住籠屋，引起唔少回響。身為二少胞兄嘅自由黨榮譽主席田少田北俊話，基層生活佢自己就見得多，呢次細佬肯去了解吓都好嘅。
直言無睇過節目
田少尋日為一個電視節目錄影，講起細佬上電視執垃圾，田少直言佢無睇過，不過身邊朋友幾欣賞，覺得二少肯放下身段「非常難得」。佢就話自己做咗廿年議員，平時接觸嘅基層市民都唔少，但係佢嘅細佬從來未做過議員，亦無真正投入過基層生活。不過田少冇直接講自己會唔會去體驗吓執垃圾同住籠屋嘅生活。
講番個電視節目，尋日有一位基層婦女嘉賓黃秀萍同田少同場。黃小姐見到田少就走上前同田少相認，原來黃小姐曾經喺田氏家族嘅萬泰製衣打過工，後來仲因為萬泰輸入外勞而失業，黃小姐仲質問咗田少幾句係咪確有其事，場面一度有啲尷尬。後來兩人都趕住節目錄影，短暫嘅交流就到此為止。