中環耳目：鍾志平宴客歎阿一招牌菜
「阿一鮑魚」楊貫一喺尖沙咀iSquare商場廿九樓開嘅阿一海景飯店，開業年幾已吸引活躍於九龍嘅城中名人幫襯，好似明天更好基金理事鍾志平（Roy）咁，就將佢當成私人飯堂。早前卓妮撞到阿Roy喺度請客，當日佢以Q嘜優質標誌局主席身份，自掏腰包請委員會成員一路開會一路歎美食，答謝大家過去一年嘅辛勞。
牛尾煲 砂鍋炒飯
在座嘅有工總旗下香港玩具協會主席丁煒章、中華煤氣執行董事兼企業營運總裁關育材、前律師會會長蔡克剛、城大電子工程系講座教授陳志豪、工業總會行政總裁邱達宏等。Roy叫咗成枱美食同一班老友分享，包括佢至愛嘅紅酒醬炆牛尾煲同埋招牌砂鍋炒飯。
Roy盛讚牛尾煲色香味俱全，好香、好食，最好就係用嚟撈飯。飯店總廚林啟勛話，炮製牛尾煲嘅秘訣係以柱侯醬、香料同蒜一齊爆香，再炆三小時。
砂鍋炒飯就係招牌中之招牌，客人即使唔食鮑參肚翅，都必點呢道招牌菜式，做法係飯喺廚房炒至九成，然後以日本砂鍋端到客人面前，再以佐料炒至全熟，難怪飯店經常飯香四溢。
