中環出更：翡翠王后演繹自家戒指
帝皇翡翠行政總裁兼仁濟醫院主席董吳玲玲經常演繹翡翠之美，幾時見佢都咁貴氣逼人。日前卓妮喺仁濟醫院嘅新春酒會上，見佢戴住一枚好搶眼嘅紅寶石加翡翠戒指，指環鑲滿以微鑲鑲成嘅白色碎鑽，將翡翠特有嘅氣質襯托得淋漓盡致。
微鑲碎鑽襯托紅寶翡翠
董太見卓妮咁欣賞，開心到不得了。佢話隻戒指係自己設計，佢精心揀選顏色靚絕嘅紅寶石同埋翡翠，以圓切角加上最時尚嘅精細微鑲，搭配色澤乾淨嘅碎鑽，成隻戒指嘅線條、顏色夠晒豐富搶眼。卓妮見佢講起翡翠咁專注投入，不愧有「翡翠王后」之稱。
微鑲係鑽飾界嘅革命技術，佢係採用極細嘅鑲釘將鑽石鑲嵌喺首飾上，由於鑽石排列極為緊密，令鑽飾望落去好似全由鑽石鋪平，完全睇唔到金屬，所以可將鑽石嘅光彩發揮到極致，係好時興嘅鑲嵌技法。
講起仁濟嘅工作，董太滿腹大計咁話，嚟緊會開設更多中醫診所同埋成立一站式耳鼻喉日間診所中心。仁濟第一副主席李文斌四月起就會接手做主席，董太任內做唔晒嘅嘢，梗由佢延續落去喇！