中環出更：李剛施子清墨寶結緣
一生醉心書法嘅福建幫頭領、全國政協委員施子清，多年來累積無數書法作品，亦多次借出墨寶參展，尋日輪到佢自己喺城市大學舉行「翰墨神飛」書法展，展出七十多件珍藏書法作品。開幕禮有近百名嘉賓撐場，除咗佢太太、愛兒施榮懷及施榮忻（Jaime）夫婦外，仲有結拜兄弟、全國政協常委楊孫西及委員盧文端，另一全國政協常委陳永棋同阿叔陳瑞球都嚟捧場，當然唔少得認識多年嘅中聯辦副主任李剛，李剛仲大爆喺十四年前與施子清墨寶結緣。
讚大書法家之作
李剛憶述話，當年任職國家文化部時，施子清做緊全國工商聯副主席，有次佢透過一個朋友收到施子清嘅墨寶，一睇就知係非一般書法。佢大讚施子清嘅書法集百家之長，創出個人獨特風格，行文流暢，絕對係大書法家之作。李剛仲話，施子清貴為中國書法家協會理事實在難得，事關內地每兩個省市只有一個理事名額，但香港咁細已有兩個，施子清就係其中一個，證明施嘅書法好了得。
施子清話，自小受父親薰陶，培養出習書法興趣，來港後亦勤力練字，今次能夠在城大展出書法好難得。城大校長郭位為答謝施多年來捐錢，特意送上一套毛筆及墨硯答謝。Jaime都為父親感高興，但自認對書法無興趣，惟有寄望兩個愛女學好書畫，發揚施家書法。