政情：社民連兩派終極格鬥
內訌大半年嘅社民連尋日上演終極格鬥，以創黨主席黃毓民為首嘅「倒陶派」趁舉行會員大會，聲稱聯同三百幾個盟友齊齊退黨，點知轉頭就畀人篤爆唔夠數。兩派人又各自打悲情牌，先有陶派代表於大會上高呼「相煎何太急」，後有黃派發出眼淚攻勢，兩派人及後又舌戰十幾分鐘，但就係各說各話。最終雖和氣收場，但卻好戲連場。
呢場終極決鬥嘅黃派代表係「一零憲章」嘅李偉儀，尋日戴住隱形眼鏡嘅佢，雙眼通紅到場，交退黨書時更加淚流披臉，話喺短短三個星期，收集逾三百個退黨申請，佔社民連成員嘅三分一。李偉儀又話以後同社民連嘅關係屬「兄弟爬山，各自努力」，所以唔會特別展開狙擊。不過佢又補咗句話，如果第日情況唔一樣，就好難講喎。
陶派方面，創黨成員麥國風話眼見社民連四分五裂好心痛，希望黃派諗清楚，因為「本是同根生，相煎何太急」。但邊個急就好難分，事關大會未開完，社民連就發聲明指三百幾份退黨申請得六成有效，仲話部分連會員資料都搵唔到，暗示對方有篤數之嫌。呢場大戲要點收科，還看嚟緊嘅選舉！