政情：施榮懷羅富昌爭掌廠商會

有七十幾年歷史嘅廠商會，會長任期嘅規定屢經變化，原本會長嘅任期係兩年，連任不設限制，但自從福建幫頭領、全國政協常委楊孫西上任後，即推動修改會章，將任期改為兩年，不得連任。自此歷任洪克協、尹德勝同埋黃友嘉幾位會長，都係做兩年就換人。

不過，實踐下來發現，兩年任期實在太短，會長難以推展會務，因為新任會長第一年要熟悉會務，第二年想大展拳腳時，上半年就又要展開新一屆會長嘅選舉工程，以便八月向三千幾名會員寄出文件，先選出九十六名會董，再選出常董同正副會長，過程都幾繁複，所以廠商會內部醞釀改例幾個月，直至上個月嘅會董會上，終以壓倒性票數通過二改三，不設連任。今年十月產生嘅新一任會長，就可以按新例做足三年喇！

各有千秋 勢均力敵

改例嘅另一個原因係接班人選唔易搵。又係嘅，每兩年就要換過個有心有力嘅會長，真係唔講得笑。不過，今屆就唔怕冇人才啦！因為有意競逐嘅兩位副會長，各有千秋。身為永富容器集團主席嘅羅富昌有「中國罐王」稱號，佢喺三十幾年前創立咗美特容器廠，至今依然喺呢行執牛耳。羅富昌喺廠商會負責財務，近年喺股票及人民幣債券嘅投資都有斬獲。

至於福建幫頭領施子清二子施榮懷，則出任多項公職，除咗代表商會加入勞顧會，周旋於勞資之間，迄今做咗廠商會展覽服務有限公司主席四年，佢揸大旗嘅工展會入場人次屢創新高，上個月啱啱結束呢屆，更加飆升至二百四十萬人次，總銷售額逾五億元，為佢贏得唔少口碑。前年佢又創辦咗第一屆「香港食品嘉年華」，今年將再接再厲，移師旺角花墟舉辦第二屆。

廠商會將於下星期四（十七日）舉行新春團拜，且看呢兩位熱門人選會否表態參選。