功夫茶平時經過連接荃灣梨木樹同沙田大圍嘅城門隧道，成日見到一個莫名其妙嘅現象，好多警車無論係四個轆抑或兩個轆，都會兜一個大圈駛入行政大樓，而唔係依循正常途徑過隧道。本來呢，功夫茶以為係「工作需要」，駛入行政大樓可能係差人做嘢，平民百姓梗係唔知佢哋做乜東東啦。
哈，謎團終於解開，多得記者踢爆，原來警車駛入行政大樓嘅真正目的係「走後門」！
正常情況而言，警車並無特權，過隧道必須同民用車輛一樣畀錢，一係直接繳付現金，一係遞上「隧道代用券」，再唔係就申請自動繳費系統，咁就慳番停車呢一個麻煩動作。不過如果你喺梨木樹隧道入口靠左駛入行政大樓，就可以繞過所有收費亭，費用全免，即係偷雞。
本報記者日前一連幾個早上駐守城門隧道收費亭附近視察，曾經見過一個早上短短三粒鐘之內，居然有十幾架警車利用呢一條「特別通道」，其中只有一架亮起閃燈，代表有事執勤。
偷雞唔畀錢過隧道已經係一個問題，好衰唔衰經過行政大樓駛入隧道必須靠右連切四、五條行車線。你知啦，城門隧道車水馬龍，出入車輛不知凡幾，唔係個個司機都會意識到左邊會有警車失驚無神殺出嚟吖嘛，萬一唔覺意造成交通意外咁點算呢？
記者跟手走去行政大樓嘅「特別通道」視察啦，係就係見到好多職員走來走去呀，不過對於警車走後門全部無動於衷。好明顯嘞，濫權行為司空見慣，職員惟有隻眼開隻眼閉囉。
呢嗱嗱嗱，嚴格而言警車偷雞過隧道唔畀錢係唔會構成「利益衝突」嘅，警察叔叔冇可能中飽私囊，事關即使繳付現金或者代用券，最終都係公帑埋單。警車走後門最有可能嘅動機係貪方便，事前懶得申領，事後省得報告。之不過咁，小數怕長計喎，隧道收入假如因此減少，有可能羊毛出在羊身上，萬一城門隧道以收支平衡作為加價藉口，咁咪害到升斗小市民一殼眼淚？所以咯喎，立法會保安事務委員會委員陳克勤狠批得一啲都冇錯，佢話警員咁嘅行為係知法犯法！
唉，開講都有話啦，小時偷針，大時偷金。有人可能會覺得警車走後門過隧道係好小事，不過當警務人員習慣成自然，濫權行為有機會由小變大，咁就弊傢伙嘞。記唔記得六、七十年代嘅腐敗警隊呀？當時一個警察食一餐霸王飯係好小事㗎咋，不過形成嘅結構性貪污文化就非常之咁大鑊，大大損害成個社會嘅正常運作。
喂喂喂，警隊新進一哥曾偉雄紮職之後咪講過嘅，對付違法者佢係「鷹派」。如果係咁就好嘞，麻煩一哥以鷹派作風處理走後門過隧道嘅違法者，功夫茶絕對唔介意嚴肅懲處，話晒香港都係法治之區吖嘛，一定唔容許警務人員知法犯法！