政情：潘佩璆湊孫老貓燒鬚
工聯會立法會議員潘佩璆唔經唔覺做咗爺爺已經四個幾月，佢尋日透露，孫仔身體相當健康，肥肥白白，不過原來孫仔嘅體重之前曾經一度下跌到近乎要入院嘅水平，佢一家連埋佢一共有三個醫生，個孫過瘦都幾老貓燒鬚，好彩經一番努力之後，孫仔依家嘅體重已經回復到正常水平，仲重過大部分同齡嬰孩添。
一度唔足磅
潘佩璆自己係聯合醫院精神科顧問醫生，個仔同新抱都係醫生，可以話係醫學世家，對子女嘅照顧當然無微不至啦，BB唔足磅真可謂一時失手嘞。近日坊間出現搶購奶粉潮，潘醫生就話孫仔冇受影響，一方面因為佢食母乳、另一方面因為孫仔飲日本奶粉，所以孫仔糧食絕對充足。
一直盛傳潘佩璆會代表工聯會喺港島出選立法會，佢尋日就話近排加碼落區見街坊，仲打算喺香港仔華富邨開多個辦事處，實行擴大工聯會版圖。佢強調，工聯會同其他建制派政黨嘅票源不盡相同，最緊要都係要做好自己先。