政情：肥胡開blog市民無份睇
互聯網大行其道，就連政府同議員都相繼設立網上平台同市民溝通。醫院管理局亦都緊貼潮流，喺佢哋嘅內聯網開設「主席及總裁blog」，等醫管局嘅員工都可以喺網上同主席胡定旭及行政總裁梁栢賢（PY）直接溝通。不過個blog只對內開放，普羅大眾暫時冇機會睇。
拍短片宣傳
肥胡為咗鼓勵同事click入佢個blog，特登自拍短片作宣傳。佢話寫blog係為咗畀員工更了解佢同PY嘅工作，同分享佢哋嘅個人感受，仲話醫管局係一個六萬人嘅機構，唔同員工都有唔同嘅睇法，希望大家踴躍喺佢個blog留言，「彈吓我或者讚吓我」，而佢同PY都一定會聽員工嘅意見，再作跟進喎。
查實醫管局過去幾年是非多多，高層同員工嘅關係又唔好，其中佢哋遲遲唔增加合約員工嘅薪酬，更令當局流失唔少人才，令員工滿肚牢騷。究竟網上平台係唔係萬應靈丹？大家又睇吓點。