政情：時薪$25田二少掃街瞓籠屋
如果大家曾經喺街見到新民黨副主席田北辰做清潔工人，日頭掃街、倒垃圾，夜晚瞓籠屋，咪以為自己眼花。呢位擁有全球七百間時裝分店嘅田家少爺，參加咗體驗貧窮嘅真人騷，過咗幾日接近赤貧嘅生活，時薪仲得廿五蚊添！
本港一個電台搞咗個節目，第二輯共有六位城中名流參與體驗貧窮，二少係其中之一。佢被安排做掃街清潔工人，日日做足九個鐘。影片所見，二少戴住口罩落手落腳執拾街邊垃圾桶，見到垃圾桶入邊嘅污糟嘢，佢都忍唔住話：「好恐怖！」攰極就坐喺街邊閉目養神，成個人落晒形，同佢平時身光頸靚差天共地。
陳智思變陳光明「仇人」
負責拍攝嘅幕後人員爆料話，佢哋用咗兩年時間游說二少參與，終於打動咗佢。事前二少好關注衞生問題，驚自己會病，好彩最終完成拍攝。
被形容為富三代嘅潮州商會青年委員會主任陳光明，係彩星玩具創辦人陳大河嘅孫仔，佢喺社聯副主席陳智思游說下，亦體驗咗幾日執紙皮、住籠屋嘅窮日子，佢笑稱陳智思係佢嘅「仇人」。已故社交名人周啟邦囝囝周國豐亦暫別中環嘅多采多姿，體驗速遞員同埋珍珠奶茶店員嘅生活，話要證明自己唔係二世祖咁簡單。