政情：劉麥懿明出山撐老公
○九年十二月先至同政府講拜拜嘅前稅務局長劉麥懿明，一年禁制期過咗無耐，舊年平安夜悄悄加入凌速有限公司做獨立執董。間公司名熟口熟面，其實係劉太老公劉偉傑旗下間公司。劉偉傑係何許人也？咪就係年年負責籌辦動漫節嘅凌速博覽有限公司主席囉。
喺○九年嘅動漫節開幕禮上，人稱「眾人媽打」嘅前民政事務局常秘李麗娟畀面到場，大家都奇怪何解媽打都嚟撐場呢？後來媽打爆料，話係劉偉傑搵佢嘅，仲爆埋劉偉傑同劉太嘅夫婦關係，當時劉麥懿明仲做緊稅務局長，當日劉太都有現身撐老公。以劉太同媽打嘅交情，媽打豈會托手㬹呢？
任獨立執董
就係咁，劉太口中嘅生意人老公身份從此曝光。呢次劉太加入凌速有限公司做獨立執董，主要負責出席董事局會議、監察公司高層同制訂公司政策等，可謂開正劉太嗰瓣，相信佢哋雙劍合璧，生意肯定蒸蒸日上。唔知今年動漫節，會唔會見到劉氏伉儷手拖手現身呢？