政情：區選三女將混戰黃埔東
今年年尾嘅區議會選舉，關係到明年立法會超級區議會議席嘅入場券同提名資格，各路人馬勢必虎視眈眈。喺○七年區選中專業會議立法會議員梁美芬，以四百多票踢走盤據九龍城區議會黃埔東八年嘅民主黨陳家偉，今年除咗要面對誓報一箭之仇嘅民主黨黃碧雲外，仲可能多咗一位半路殺出嘅勁敵，就係年輕貌美嘅前港姐袁彌明（Erica），形成三女混戰局面。呢個選區，將會係今年區議會選舉嘅其中一個焦點。
九成九會競逐連任區議員嘅梁美芬，尋日一早展開車輪式落區拜年活動。對於三女混戰，梁美芬看似處之泰然，佢坦言歡迎大家一齊做好社區。尋日佢喺長沙灣保安道街市派財神時，啲街坊見到佢好似見到蜜糖咁蜂擁而至，所以話佢氣定神閒都有啲理由嘅。佢仲話應戰方法就係做好本分，相信呢幾年嘅地區服務都為人接受。保安道街市唔喺佢嘅區議會選區，佢喺黃埔東會落多幾錢肉緊，今日就會拉埋老公同兩個仔，一齊同居民拜年。
選民力量狙擊白鴿黨
磨拳擦掌嘅民主黨黃碧雲喺舊年政改一役，身兼終極普選聯盟副召集人，喺《城市論壇》以一敵十，力壓維園阿伯阿哥，風頭一時無兩，結果政改方案順利通過。對於年尾區選，佢嘅盤算係即使袁彌明喺黃埔東落腳，頂多攞到泛民選民中最激嗰一成人選票，即係
走百幾二百票，但係咁樣已足以令黃碧雲落敗，所以黃碧雲話，佢嘅策略係做好自己同埋提升選民危機意識、谷高個投票率，因為投票率高，對白鴿黨最有利。
至於挾着前港姐之名嘅Erica，由最初打算去中西區狙擊民主黨甘乃威，到近期一百八十度轉變改去九龍西，原來係聽命於所屬組織選民力量，因為選民力量認為，Erica同上述兩位女將鍊過極具睇頭。有晒心理準備嘅Erica話，其實佢落腳邊區仲有待商討，不過佢喺黃埔碼頭已經掛咗橫額，佢相信區會經歷四年洗牌，好多嘢都唔同咗，參選係畀多個選擇畀選民。睇嚟黃埔東嘅選民，真係可以慢慢揀，睇清楚邊個至係自己杯茶。