中環出更：邱李茂琪4卡鑽錶閃爆馬場
大尺碼嘅手錶，唔再係男士專利。女裝錶近年亦要分庭抗禮。有「皇帝的珠寶商」美譽嘅Cartier，早前推出新系列Captive de Cartier，最大尺碼係直徑50mm，名媛邱李茂琪（Margaret）都有一隻。
生日禮物值逾70萬
Margaret大年初三同老公邱子傑現身沙田馬場，戴上白金鑲鑽卡地亞腕錶，艷光四射。Margaret甜絲絲話，隻錶係去年生日時由老公送贈，鑽石總重量達四點一卡，錶價約七十多萬元，手上呢隻係限量版，更具珍藏價值。Margaret喜歡收藏名錶，卡地亞名錶設計匠心獨運，啱晒佢。
講番Captive系列，造型焦點在於十二時鏤空布局，以一個鑲鑽裝飾作錶耳，連繫錶帶，營造出高雅不凡效果。近日天氣乍暖還寒，Margaret前日急不及待着上Chanel春夏露背連身裙，配埋一條Chanel頸鏈，卓妮問佢怕唔怕冷襯，Margaret勇字當頭話：「只要着得靚就得嘞！」