中環耳目：莊家彬排長龍歎人氣拉麵
唔好以為莊士集團副主席莊家彬（Albert）呢啲富二代只懂去貴價餐廳用膳，原來Albert為咗食碗好拉麵，排長龍亦在所不惜！呢間令Albert瘋狂嘅日式拉麵店名為「豚王」，由著名時裝設計師鄧達智嘅阿叔、博愛總理鄧慶治嘅囝囝開設，位於中環蘭桂坊，近期熱爆互聯網，被喻為「本港最正最地道嘅拉麵」添。
風靡港人嘅豚王有四種招牌拉麵，分別係用上豬骨湯底嘅「豚王」、配以墨魚汁嘅「黑王」、辛辣口味嘅「赤王」，同埋加上橄欖油同芝士嘅「翠王」，每款拉麵都配以叉燒同木耳，最特別係無論佢嘅湯底鹹度、秘製味噌及葱嘅分量，抑或麵嘅軟硬，都可以畀食客話事，難怪Albert咁喜歡。
一星期至少食兩次
由於豚王舖位面積不大，舖內座位只有二十個位左右，所以每每一開舖，旋即吸引慕名而來嘅食客嚟排長龍，先可以品嘗到呢碗人氣拉麵。Albert大讚豚王嘅拉麵非常出色同地道，更食到佢「上癮」，一星期至少食兩次，排長龍都冇所謂喎。佢仲講笑叫卓妮唔好咁快介紹豚王畀大家，免得條龍長上加長！呢度日賣二百碗麵，賣完就收工。