中環出更：名人投資備課兔年有錢途
新年伊始，發達要部署。去年樓股齊升，買樓抑或買股，荷包都脹卜卜。踏入兔年，波動難免。城中名人已做足功課，今年主動出擊尋找「錢途」。香港福布斯富豪中總會長蔡冠深計劃投資內地或東南亞房地產；爸爸方潤華同屬香港福布斯富豪嘅中總副會長方文雄（David）就睇好港島區甲級寫字樓；理文造紙首席執行官李文俊就繼續叫大家買人民幣。
經濟暗藏隱憂，今年投資布局，難度較去年高。卓妮手中無水晶球，惟有請城中名人為市況把吓脈。蔡冠深大年初二出席煙花匯演酒會，講起埃及緊張局勢，佢話心理影響大於一切，唔使太擔心。佢又預測今年經濟唔會差過舊年，會繼續投資金融同房地產。
睇好內需、內房股
David嘅家族，投資物業眼光準繩，今年計劃掃入優質寫字樓收租，尤其睇好港島區嘅甲級寫字樓。講到買股，David首選內需股，尤其睇好內地食品、電器及水利股等，但佢預測股市下半年波幅大，炒股要識得落車。
理文造紙首席執行官李文俊初三現身沙田馬場，講起投資，文俊話，港元貶值勢所難避，買定人民幣冇走雞，至少可以抵銷內地食品帶來嘅通脹。
物流公司東源大地老闆王嘉恩（Albert）係四川省政協，投資大計離不開四川，Albert話，四川發展勢頭好，消費力強勁，心思思想喺當地買番層樓，博至少百分之十嘅升幅。
做證券生意多年嘅全國政協委員朱蓮芬就對內房股看高一線，理由係內地經濟騰飛，優質物業唔憂無人買，內房股早前受中央調控措施影響，陷入低潮，至今跌咗好多，依家趁低吸納，應該有唔錯回報。不過卓妮忠告大家，投資要量力而為，做好風險管理。祝大家兔年投資路路亨通！
卓妮