赤口果然係赤口，大年初三發生咗一宗震驚全國嘅新聞，惡過阿珍嘅港女導遊阿蓉居然辱罵內地遊客係狗，先而口角，繼而動武，雙方大打出手！
打架事件引起國家旅遊局關注，中央電視台以及內地多個地方電視台都有報道添，香港呢一塊購物天堂嘅金漆招牌想唔蒙污都唔得咯。
阿蓉因乜事幹咁失禮街坊？原來導火線又係強迫購物。一批內地新春港澳團旅客被安排到土瓜灣一間珠寶店購物，其中一對安徽夫婦留喺旅遊巴士「罷買」，身為導遊嘅阿蓉就冷嘲熱諷，又話人哋係狗，又話安徽人窮，更加恐嚇話：「不購物就返不到深圳。」結果咯喎，受辱嘅安徽夫婦無名火起三千丈，終於釀成肢體衝突。
真係無巧不成話，今次嘅巴辣導遊阿蓉不但劏客手法同阿珍如出一轍，連帶樣貌甚至髮型都極之相似，莫非呢個造型係旅行團「刀手」嘅標誌？如果係咁就簡單嘞，以後見到呢一款「疑似阿珍與阿蓉物體」，大家避之則吉！
話時話，自從上次發生咗阿珍劏客事件之後，香港旅遊業議會唔係推出十招補鑊咩？包括「一團一導遊」嘅措施唔係已經實施咗一星期咩？點解仲會有變本加厲嘅情況出現？旅遊界立法會議員謝偉俊係咁講嘅，佢狠批有關招數只係「斬腳趾避沙蟲」，導遊薪酬低、無收入保障以及零團費等等主要問題尚未解決，旅客同導遊仍然存在嚴重矛盾，爭執衝突無可避免。
至於導遊總工會理事長黃嘉毅，佢話新措施實施以來，仍有八成導遊冇底薪。換言之，刀手唔強迫購物就賺唔到佣金，咁就梗係大劏特劏啦。
計功夫茶話齋，旅議會始終係一個冇乜牙力嘅業界組織，自我規管當然乏善足陳。如果特區政府唔想辦法加強監管，阿珍之後有阿蓉，阿蓉之後仲會有千千萬萬個刀手，劏客醜聞肯定陸續有來。
你睇人哋廣東省旅遊部門吖，已經展開「港澳遊百日整治大行動」以遏止旅行團劏客，第一輪行動係派出一百名監督員「放蛇」，針對購物問題同接待服務明查暗訪，如有發現旅行社違規，將上報省市旅遊主管部門，並經由傳媒對外通報。
香港又點呢？功夫茶唔覺本地負責監管旅遊業嘅政府部門或者公營機構有乜嘢動作囉。好似旅遊事務署咁吖，名義上發展旅遊業，實際上都唔知佢哋做乜。至於旅遊發展局咯喎，聽講主要工作係「向外推廣」喎，所以分屬自己友嘅香港人通常又係唔知佢哋做乜。
咦咦咦，咪住先，涉及打架事件嘅內地遊客話係一場誤會，好滿意旅行社安排云云。點解忽然之間態度會有咁大轉變嘅呢？功夫茶唔會胡亂猜測，之不過咁，遊客嘅態度改變唔到一個事實，香港導遊真係有強迫購物，打架事件確實令招牌蒙污。
唉，好心懶到出汁嘅官老爺唔好再推卸責任啦，單靠旅議會係冇用㗎，一定要嚴厲整頓旅遊業，否則下次暴力升級就肉酸咯！