政情：黑英買豬肉畀檔販鬧
前天文台台長林超英退休前掌管天文台，領導一大班天文台員工，但退休後反而去街市買豬肉都畀人鬧？黑英就講笑話，中年男士去街市買餸唔夠女士着數喎。
「十蚊咁少點切呀」
黑英尋日喺電台節目大談退休生活，講到退休後發覺自己以前只識返工，日常生活嘅瑣事反而搞唔掂，連去街市買十蚊豬肉都被拒，搞到畀豬肉佬歧視：「得十蚊咁少，點切呀？」真係連前台長都無面畀！
結果黑英要對住豬肉佬解釋原委，話「男人老狗得一個人食飯，好慘㗎……」最後對方至肯切十蚊豬肉畀佢。後來黑英買多幾次十蚊豬肉，就做咗豬肉佬嘅熟客仔。
黑英仲話退休初期高估咗自己能力，依舊不停出席大大小小活動，似患咗退休後過度活躍症，至幾個月前終於感到疲倦，發現唔應該太忙，於是今年開始工作推得就推，就算去旅行都唔鍾意奔波勞碌，反而鍾意喺香港境內行吓走吓，例如得閒去西九龍海濱長廊散散步，成個人都舒暢啲！