政情：克勤仔兔年拉埋天窗
立法會議員陳克勤同佢嘅金融界女友蜜運多年，外界多次問佢幾時結婚，佢都只帶大家遊花園。踏入兔年，克勤仔終於一改以往口風，尋日面對同一條問題時，竟然豪氣地拋下一句：「希望啦！」莫非克勤仔有意喺今年結束佢嘅王老五生涯，同女友拉埋天窗？
唔鋪張玩低調
克勤仔尋日偕同民建聯大埔區多名區議員登上新春花車，向新界東街坊拜年兼派利是。巡遊期間，克勤仔向我哋透露佢有意喺今年同女友結束愛情長跑，但坦言女友家人向來唔喜歡鋪張，所以結婚都會低調行事喎。
克勤仔又自爆，今個新年除咗初一至初三有得放假陪家人外，其餘時間都要工作同應酬，加上區選在即，未來更要出多幾錢力幫一班有志出戰區選嘅生力軍打氣，呢位大師兄認真唔話得嘞。