政情：梁國權避談接掌港鐵
港鐵行政總裁周松崗今年底合約屆滿之後就會榮休，公司要全球招聘物色繼任人選。其中一個熱門人選，就係港鐵財務及業務拓展總監梁國權，佢喺公司管理層入面算係好後生，本來接棒上位無難度，可惜舊年爆出八達通出賣客戶私隱事件，搞到佢要辭任八達通公司非執行主席，跑出機會率即時大減。
受八達通風波拖累
早幾日佢同傳媒一齊去視察深圳地鐵發展，問到有無人搵佢做總裁，佢都係支吾以對，唔知真係無信心定唔想太高調，驚臨門脫腳？
梁國權喺八達通私隱事件之後，街上多咗好多人認得佢，不過呢單係負面嘢。即使佢努力撇除「壞帳」，不過唔多唔少對佢條青雲路都有啲影響。
早幾日成班傳媒同佢上深圳視察業務，順口問吓有無人搵佢做總裁，佢即時變得好審慎，猛話自己喺港鐵好多嘢睇，海外發展呀、內地業務呀咁，一於帶傳媒遊花園，完全係顧左右而言他，對於係咪會接棒，佢避開冇講。