政情：李慧琼玩超級區會?!
人多原來未必好辦事，政黨中最疊馬嘅民建聯，布陣出戰明年立法會「超級區議會」，戰將選擇多，都唔知係優勢定係煩惱。正當民記內部爭扯，應派重量級明星出征，還是借此機會畀新人上位之際，一個中間落墨方案呼聲愈嚟愈響，就係以知名度不遜黨內大佬嘅第二梯隊尖兵李慧琼（Starry）上陣，順勢部署深水埗區議員鄭泳舜接棒，競逐九龍西直選議席，對民記整個九西布局可說一箭雙鵰。
胃大食量大，人多自然雜音多，民記競逐超級區議會，由最初傾向派新人參選，到其後內部有聲音傳出，應該搵吸票力強嘅現任立法會議員壓陣，人選問題至今未見眉目。超級區議會議席嘅人選，牽動直選擺位，據聞民記內部至今仍以「新人派」聲音較響，話晒叫大佬輩插旗選區議會，始終阻塞新人上位之路，爭議較大。
鄭泳舜九龍西插旗
派第二梯隊出戰方面，民記高層內有消息指，眾多新人中，現以Starry、葛珮帆同鍾樹根嘅呼聲較大，三人之中，又以Starry看高一線。理由主要有兩個。第一，以曾經喺立法會直選中排頭位、全港知名度較高嘅人披甲，喺講求人氣同聲勢嘅超級區議會議席選戰始終有着數，得勝安全系數高啲，太新嘅人怕壓唔到陣。第二，九龍西內有一顆新星鄭泳舜，正等緊上位，但民記喺九西嘅形勢，係一席必穩，兩席太難，若然Starry轉戰超級區議會，就可騰出空位畀鄭接棒，一箭雙鵰。反而，其他四區喺政改方案通過後，勢增一至兩個議席，民記都有機會以舊帶新，攫取兩席，「讓位」安排嘅迫切性相對無咁大。
不過，據聞Starry本人不太願意披甲選超級議席，怕自己資歷尚淺，應付唔嚟，而且只係做咗一屆直選議員就過橋抽板，唔係咁好，反過嚟睇，佢競逐連任九龍西，幾近零風險。不過參選超級議席始終要係區議員，各黨如何擺位，相信要睇埋今年十一月區議會選舉嘅戰果，局勢至會明朗。