中環耳目：袁振寧推介葫同炭爐燒肉
灣仔星街附近特色食肆林立，好多為食一族經常喺度出沒。早前卓妮見到縱橫遊業務顧問兼博愛醫院總理袁振寧、南華（快捷）旅行社執董沈朝生（Jason）等旅遊界第二代，喺灣仔聖佛蘭士街嘅葫同日式燒肉聚會。呢度嘅炭燒肉出晒名，係香港少數攞到炭牌嘅食肆，難怪咁受肉食一族歡迎。
袁振寧同Jason係旅遊世交，兩人自細就玩到大，難得至今依然好啱傾，業務上亦都合作無間。當日在座嘅仲有袁振寧太太嘅細佬林子泰，佢爸爸係華訊主席兼博愛醫院副主席林賢奇。卓妮見佢同袁振寧好好傾，席間經常玩到姐夫招架不住，勁搞笑。近期經常現身博愛活動嘅藝人范振鋒都喺度。
滿室肉香 感覺一流
佢哋叫咗蟹膏帶子刺身、鹽葱牛舌、椒鹽霜降黑豚肉同烤肉醬牛五花等招牌菜式，啲肉喺客人枱上嘅炭爐即燒，滿室肉香，食落彈牙鮮美，炭燒味更係無可取代，感覺一流。
不過成班大男人難得暫時拋低工作同妻小，卓妮見佢哋傾偈開心過食嘢噃！