中環出更：龐盧淑燕貪靚戴眼鏡遮紋
激光矯視手術大行其道，人稱「開心果」嘅保良局副主席龐盧淑燕，半年前做咗呢個手術，脫離四眼一族。不過每次出席公開場合，龐太照樣以眼鏡Look示人，原來副框無鏡片，佢只當成飾物襯衫。講到至愛時裝品牌，龐太就鍾情於法國著名品牌LEONARD。
自爆矯視獲重生
卓妮早前出席化妝品牌活動，撞見一身花綠綠嘅龐太，佢染咗一頭紫髮，配埋一副紫色鑲石眼鏡，神采飛揚。有七百度近視嘅佢自爆矯視後重生，睇嘢唔再矇查查，本來可以速速掉晒全屋眼鏡框，但龐太啱啱相反，四出狂掃新框，用嚟遮魚尾紋喎。
龐太對眼鏡專一，買衫都係一樣，鍾情法國名牌LEONARD多年，喜歡其設計高雅，顏色Colorful，易配搭。LEONARD擅長以色彩鮮艷嘅繁花做圖案，質料飄逸唔易縐，一條裙閒閒哋售五位數字，但名人客仔多不勝數，行政會議成員楊敏德同健康快車創會主席方黃吉雯都係佢嘅粉絲。