中環出更：鄧達智盆菜宴為母賀壽
初三赤口不宜拜年，用嚟拜壽就最Good。前晚初三，設計師鄧達智（William）喺屏山鄧氏宗祠筵開四十六圍盆菜宴賀媽咪八十二歲生日，着住William為佢度身訂造紫貂皮草出席壽宴嘅鄧媽媽老當益壯，親朋好友輪住上前同佢祝壽，卓妮都乘機討教養生之道，鄧媽媽話每日都會郁手郁腳做運動，每餐食半碗飯就夠，佢仲好知足咁話唔使點買衫，因為有乖仔幫佢做衫。William人緣佳，鏞記老闆之一甘琨禮（禮哥）、名畫商人祁文傑、少年食神林澄光、流浮山廚神劉嘉麟都有嚟，一於良朋歡聚初三夜。
四十六圍座無虛席
孝順仔鄧達智為媽媽搞嘅盆菜生日Party已經有十幾年，圍村人重鄉土人情，每年初三盆菜宴都一呼百應，今年亦唔例外，四十六圍枱未等到太陽落山就已經坐滿人，由上年開始仲加設舞麒麟環節，令氣氛更加濃厚。不過點濃都唔及人情味濃，宴會高潮係人人期待嘅雞鴨飯，呢個飯用大件厚切嘅雞同鴨件，加埋雞鴨下欄，配以惹味薑葱同冰糖一齊炆，未入口都已經香味四溢。不過呢個飯唔係逐圍上，而係喺祠堂中間開張枱，將兩大桶飯放上去等各位鄉親父老自行添飯。
大家聞到飯香，個個老饕都醒目攞定碗出去攞，最近飯煲嘅朋友仲會主動幫外圍嘅添飯，人情味拍得住飯香。卓妮望吓錶，十分鐘未夠，師傅就要準備另一煲出嚟再裝滿。怪唔得少年食神一到場，就叫定卓妮做好心理準備隨時「動身」，仲話呢個飯連厭食症都開口，果然名不虛傳。
禮哥平時食慣珍饈百味，但係呢個盆菜宴就令佢日思夜想，事關依家好多改良咗嘅盆菜都着重貴氣，加咗好多名貴食材落去，反而一個正宗風味嘅簡單盆菜就幾近失傳。禮哥話佢係一個實而不華嘅人，鍾愛樸實風味，可惜過去幾年都要出門，難得今年喺香港，所以一定要同老友祁文傑嚟試吓真正嘅圍村盆菜。
卓妮