尋日大年初二適逢立春，開年兼開春，咁好意頭，開年飯梗係唔可以求其啦。不過咁，今年好頭痛，好多家庭主婦為咗呢餐開年飯，既勞心又勞力，仲要周圍格價，有啲甚至要跨區買餸添，無他嘅，家陣樣樣起晒價，真係有巧婦難為無米炊之嘆。
唔係講笑，如果唔先格吓價，荷包好傷㗎。呢，好似開年飯主角活雞咁，平均價格比平時貴咗兩到三成，一隻閒閒地要二百幾蚊至有交易；代表好意頭嘅鯉魚同樣貴兩成以上；部分應節蔬菜賣幾十蚊一斤，問你怕未。對好多基層家庭嚟講，一餐似樣啲嘅開年飯分分鐘貴過成家人半個月伙食開支，新年過後睇怕有排篤腐乳。
上環有間海味舖年年按傳統習俗食開年飯，負責煮餸嘅阿嬸話，今年食材成本貴咗好多，自己年紀大想退休，下個農曆新年可能唔會再煮開年飯嘞。計功夫茶話齋，呢位阿嬸除咗年紀大想退休，餸菜太貴睇怕亦係無心戀戰嘅原因之一。
百物騰貴，主婦難為。通脹持續飆升，低下階層被迫節衣縮食，生活質素不斷下降，對港府施政愈來愈不滿。尋日開年，有工會組織發動百幾人操上禮賓府同煲呔曾「拜年」，請願人士送上食米，諷刺當局唔知米飯貴；亦有人上演「打老虎」街頭劇，寓意通脹猛於虎，促請當局正視問題。
其實，連日來都有唔少市民上街遊行，要求港府紓解民困，還富於民。有政黨用紙紮車向政府開年，諷刺煲呔曾政府只會做守財奴，坐擁幾千億元財政儲備，對基層市民「見死不救」，再唔回應市民訴求，等民怨爆發，隨時會「車毀人亡」。
話時話，啱啱過去嘅虎年經濟增長強勁，港府收入激增，肥到連襪都着唔落，家陣兔年嚟到，照計都應該要獲利回「兔」至啱數㗎。點知當局好似借咗聾耳陳隻耳咁，對還富於民嘅呼聲詐聽唔到，你話市民唔就假。
唉，弱勢政府百事哀，呢個政府雖然仲有一年幾至收檔，但已經提早變成跛腳鴨。上有煲呔曾成日掛住退休後去邊度歎世界，下有一眾高官條條fing，坐喺度等收工，抱住少做少錯、唔做唔錯嘅心態，對基層市民苦況不聞不問，闊佬懶理。
古人話齋，百姓足，君孰與不足；百姓不足，君孰與足。官富民貧，通常只有一個結果，就係官逼民反。新財政預算案月底出台，雖然市民對夕陽政府已經冇乜期望，但咪話功夫茶唔提醒，如果扮晒諮詢民意嘅財政司司長鬍鬚曾到時冇料到，激起民怨咯喎，咪話扮諮詢，佢扮烏龜都唔掂！