《基本法》第一百零七條講到，特區政府必須以量入為出作為理財原則，應該善用公帑，事實上又係點嘅呢？有一個民間團體喎，索性以「107動力」命名，開宗明義監察政府如何運用公帑。呢個團體最近搞咗一次網上評審，邀請網民選出二○一○年十大浪費公帑事件。
未入正題之前，功夫茶想問一問大家，乜嘢叫做善用公帑？答案當然因人而異啦，如果你係公務員，你可能會理直氣壯咁話，準時出糧兼夾大幅加薪咪就係善用公帑囉。之但係香港七百萬人口唔係個個都係公務員吖嘛，好多仲係搵朝唔得晚添，所以善用公帑比較合理嘅答案係造福百姓。譬如話，你用公帑紓緩貧富懸殊，你用公帑令人安居樂業，咁咪冇人話你成個敗家仔咁洗腳唔抹腳囉。
好嘞，言歸正傳，睇睇「107動力」公布嘅十大浪費公帑事件係乜東東先。
各位觀眾，眾望所歸，網民投票選出浪費公帑第一位係「政改起錨宣傳費耗資公帑九百萬」！
呢嗱嗱嗱，政改起錨莫講話浪費公帑，計功夫茶話齋簡直係疲勞轟炸。一眾高官嘈喧巴閉叫口號都算嘞，最惡頂係嗰幾套無厘頭宣傳短片，功夫茶諗極都唔明，阿媽幫阿女整咗一條裙，同政改有乜嘢關係呢？人哋阿茂整餅，佢就阿媽整裙，非常之咁九唔搭八，投資拍攝同揼錢落海冇分別。
至於浪費公帑第二位咯喎，就係「西九文化促成班分二億三千萬豬肉」。呢件事簡單咁講就係貴到無倫，廣州歌劇院嘅設計費只係二千九百萬元人民幣，廣州新電視塔嘅設計費只係四千五百萬元人民幣，偏偏西九嘅設計同顧問費係港幣二億三千萬，都唔知點解可以貴得咁交關。
浪費公帑第三位又係乜呢？答案係「特區政府為面子豪花五百億辦亞運」。呢件事大家記憶猶新啦，都唔使多費唇舌詳加論述咯，總之一旦成事，埋單計數肯定唔止五百億。好彩立法會嚴密把關咋，財務委員會將申辦亞運嘅鴻圖大計一嘢扑低，否則未來十二年都唔知要用幾多納稅人嘅血汗錢填入呢一個無底深淵。
由於篇幅所限，請恕功夫茶唔再為大家介紹第四至第十位浪費公帑事件。不如咁吖，大家從另一個角度諗一諗，政府點樣做先至叫做量入為出？即係咁，假如財政司司長曾俊華唔再做守財奴，財政預算案唔再扮晒叉燒玩狼來了，切切實實推出種種措施利民紓困，咁咪係量入為出囉。喂，唔好唔記得，庫房水浸呀，全世界都認為政府儲備過多，如果咁都唔肯開倉派糖，「量入唔出」涉嫌違反《基本法》㗎，老友！
唉，鬍鬚曾自己都識講啦，應使則使吖嘛。亂咁起錨呢家嘢絕對唔應該使，解救市民燃眉之急就應使到極。
唔好話功夫茶嚇鬼，睇睇突尼斯，睇睇埃及，人哋搞到示威不斷死傷枕藉，無非都係因為黎民百姓冇飯食咋。你試下繼續官富民窮吖，守財奴遲早受到萬民唾棄！